कूटसमस्या

गतसप्ताहे कार्यालये कयाचित्कूटसमस्यया सह युध्यमान आसमहम्। द्विसहस्रा नूतनाः क्रेतार आस्माकीनाज्जालपुटात्क्रेतुन्न शक्नुवन्तीति मामकेन परिवेक्षकेन मां सूचितम्। केनापि हेतुना क्रेतॄणाङ्क्रयणानुज्ञावधिः (‘बाइङ्ग्-सेशन्-टाइमौट्’) न्यूना जाता। केन कारणेन सोमवासरादारभ्य शुक्रवासरं पर्यन्तमहमन्विष्टवान्। अन्ततः शुक्रवासरे समस्यायाः समाधानं प्राप्तम्। मम परिवेक्षको मया प्रसन्नोऽभवत्। क्रेतारोऽपि प्रसन्ना अभवन्।