अंशापणः पुनरपप्तत्

अद्यांशापणः पुनरपप्तत्। शुक्रवासरेऽपि भूरिप्रमाणेन सोऽपतत्। तद्दिनेऽहङ्किमप्यंशपत्राणि नाक्रीणि। सुयोगस्य क्षेपो कृत इति विचिन्त्य सप्ताहान्ते विषादो मयानुभूतः। अद्यांशापणः केवलङ्घण्टाचतुष्टयँय्यावदुद्घाटितः। प्रातःकालादेवाहं तस्मिन् दृष्टिं प्रसारयन् सङ्गणके स्थितः। यदा स पतन्नासीत्तदा कानिचनांशपत्राण्यक्रेषि। सद्य गतपञ्चसु वर्षेषु यन्ननिवेशितं तत्सर्वं लाभशून्यञ्जातम्। इदानीं यावन्मूलनिधिस्तु संरक्षिता। आगामिषु दिनेष्वंशापणः कथं व्यवहरिष्यतीति द्रष्टव्यम्।